thesakshi.com : ఆంధ్రప్రదేశ్‌లో గత మూడేళ్లలో 800 మంది మహిళలపై అత్యాచారాలు జరిగితే ఒక్కరికి కూడా న్యాయం చేయలేదని తెలుగుదేశం పార్టీ అధినేత చంద్రబాబునాయుడు దుయ్యబట్టారు. మహిళలపై నేరాలకు జగన్ ప్రభుత్వ వైఫల్యమే కారణమని ఆరోపించారు. టీడీపీ ముఖ్య నేతలతో ఆ పార్టీ అధినేత చంద్రబాబు సోమవారం వ్యూహ కమిటీ సమావేశం నిర్వహించారు. మహిళలకు రక్షణ కల్పించడంలో ప్రభుత్వ వైఫల్యంపై రాష్ట్రవ్యాప్తంగా నిరసనలు తెలపాలని ఈ సమావేశంలో తీర్మానించారు. బాధిత మహిళలకు న్యాయం చేయాలనే డిమాండ్‌తో ఈ నెల 27న ధర్నాలు చేపట్టాలని నిర్ణయించారు.
అలాగే, చంద్రబాబు మాట్లాడుతూ.. ఉద్యోగులు, ఉపాధ్యాయులపై ముఖ్యమంత్రి వైఎస్ జగన్మోహన్ రెడ్డి ప్రతీకార చర్యలు దుర్మార్గమన్నారు. న్యాయం చేయాలని రోడ్డెక్కితే నిర్దాక్షిణ్యంగా అణచివేస్తున్నారని ఆవేదన వ్యక్తం చేశారు. హక్కుల కోసం పోరాడితే అరెస్టులు చేస్తున్నారన్నారు. ఇక, విద్యార్థులకు విద్యా సంవత్సరం ప్రారంభాన్ని జులై 8కి మార్చడం ఏంటని ప్రశ్నించారు. ప్రభుత్వ విద్యావ్యవస్థను నాశనం చేయాలని చూస్తున్నారని దుయ్యబట్టారు. జగన్ అసమర్థ పాలనతో రాష్ట్రంలో యువత భవిష్యత్తు కాలరాశారని విమర్శించారు. మిగులు విద్యుత్‌ ఉన్న రాష్ట్రాన్ని విద్యుత్‌ కోతలతో అల్లాడిపోయేలా చేశారని మండిపడ్డారు. పోలవరం ప్రాజెక్టును తన అసమర్థతకు బలి చేశారని దుయ్యబట్టారు.
డయాఫ్రమ్ వాల్ దెబ్బతింటే గత మూడేళ్లుగా ఎందుకు దాచి పెట్టారని సీఎం జగన్‌ను చంద్రబాబు సూటిగా ప్రశ్నించారు. పోలవరం అథారిటీ, కేంద్ర ప్రభుత్వం తప్పుబట్టినా.. మూర్ఖంగా ముందుకు వెళ్లి ప్రాజెక్టుని నాశనం చేశారన్నారు. డయాఫ్రమ్ వాల్ ఎందుకు కూలిందో చెప్పకుండా.. టీడీపీపై ఆరోపణలు చేస్తున్నారని మండిపడ్డారు. రాష్ట్రంలో పుష్కలంగా వర్షాలు కురిసినప్పటికీ తాగునీటి కష్టాలు ఎదురవడానికి ప్రభుత్వ అసమర్థ విధానాలే కారణమని చంద్రబాబు విమర్శించారు