ఏపీ గ్రామ, వార్డు సచివాలయ సిబ్బందికి శుభవార్త.. ఆ కల నెరవేరబోతుంది..
ఏపీ గ్రామ, వార్డు సచివాలయ సిబ్బందికి జగన్ సర్కార్ శుభవార్త చెప్పింది. వచ్చే అక్టోబర్‌ నాటికి రెండేళ్ల సర్వీసు పూర్తిచేసుకున్న గ్రామ, వార్డు సచివాలయ ఉద్యోగులకు ప్రొబేషనరీ పూర్తైనట్లు ప్రకటించేందుకు.. జిల్లాల్లో అవసరమైన చర్యలు చేపట్టాలని గ్రామ, వార్డు సచివాలయాల శాఖ ప్రత్యేక ప్రధాన కార్యదర్శి అజయ్‌ జైన్‌ అన్ని జిల్లాల కలెక్టర్లకు ఆదేశాలు జారీచేశారు.
2019 అక్టోబరు నుంచి 1.34 లక్షల గ్రామ, వార్డు సచివాలయ కార్యదర్శులు పనిచేస్తున్నారని, ఈ ఏడాది అక్టోబరు 2 నాటికి వారికి రెండేళ్ల సర్వీసు పూర్తవుతుందని వారికి ప్రొబేషన్‌ ప్రకటించాల్సి ఉందని తెలిపారు. అదే విధంగా ఆయా శాఖల అధికారుల నుంచి డిపార్ట్‌మెంటల్‌ పరీక్షలకు సంబంధించి వివరాలను సేకరించాలని సూచించారు.
రాష్ట్రవ్యాప్తంగా గ్రామ, వార్డు సచివాలయ ఉద్యోగాల నియామక ప్రక్రియ అంతా జిల్లా కలెక్టర్ల నేతృత్వంలోని జిల్లా సెలక్షన్‌ కమిటీ (డీఎస్సీ)ల ఆధ్వర్యంలో జరిగిన విషయం తెలిసిందే. అక్టోబర్‌ నాటికి రెండేళ్ల సర్వీసు పూర్తిచేసుకున్న వారి వివరాలతో పాటు వారి పోలీసు వెరిఫికేషన్, డిపార్ట్‌మెంట్‌ టెస్ట్‌ ఉత్తీర్ణత వివరాలను సిద్ధం చేసుకుని వాటిని నిర్ణీత ఫార్మాట్‌లో గ్రామ, వార్డు సచివాలయ శాఖకు తెలియజేయాలని అజయ్‌ జైన్‌ కలెక్టర్లను కోరారు.