thesakshi.com : ఒలెక్ట్రా గ్రీన్‌టెక్ హెవీ డ్యూటీ ఎలక్ట్రిక్ టిప్పర్ ట్రయల్ రన్ ప్రారంభం..
భార‌త్‌లో మొట్ట‌మొద‌టి హెవీ డ్యూటీ టిప్పర్..
త్వరలో అత్యాధునిక సదుపాయాలతో హైద‌రాబాద్‌లో యూనిట్..
ఓలెక్ట్రా గ్రీన్‌టెక్ లిమిటెడ్ (OLECTRA) తన ఉత్పత్తి పోర్ట్‌ఫోలియోను ట్రక్ విభాగంలోకి విస్తరించే ప్రయత్నంలో భాగంగా 6×4 హెవీ డ్యూటీ ఎలక్ట్రిక్ టిప్పర్ ట్రయల్ రన్ శుక్ర‌వారం నాడు విజయవంతంగా ప్రారంభించింది. ఎలక్ట్రిక్ బస్సుల తయారీలో అగ్రగామి, మార్కెట్ లీడర్‌గా ఉన్న ఒలెక్ట్రా ట్రక్కుల తయారీకి శ్రీ‌కారం చుట్టింది. అందులో భాగంగా రూపొందించిందే ఈ అంతర్నిత హెవీ-డ్యూటీ ఎలక్ట్రిక్ టిప్పర్. ఇది భారతదేశంలోనే మొట్టమొదటిది, సింగిల్ ఛార్జితో 220 కి.మీ. ప్ర‌యాణం చేయ‌వ‌చ్చు. ఈ టిప్పర్ 25 శాతం డ్యూటీ బోగీ సస్పెన్షన్ గ్రేడబిలిటీ (ఎత్తైన రోడ్లూ, ఘాట్ రోడ్లు) కూడా కలిగి ఉంటుంది. త్వరలో హైదరాబాద్ శివార్లలో అత్యాధునిక సదుపాయాలతో కూడిన ఉత్పత్తి యూనిట్ ప్రారంభం కానుంది.
ఈ సందర్భంగా ఒలెక్ట్రా గ్రీన్ టెక్ చైర్మన్‌- మేనేజింగ్ డైరెక్టర్ కెవి ప్రదీప్ మాట్లాడుతూ, “భారతదేశంలో ఎలక్ట్రిక్ మొబిలిటీలో అగ్రగామిగా ఉన్న, ఒలెక్ట్రా ఇప్పుడు హెవీ డ్యూటీ టిప్పర్ ట్రయల్స్‌ను ప్రారంభించింది. భారతదేశంలో ఈ రకమైన ట్రక్ ఇదే మొదటిది కావ‌డం గర్వకారణం. పెట్రోల్, డీజిల్ ధ‌ర‌లు విపరీతంగా పెరుగుతుండటం తో, ఎలక్ట్రిక్ ట్రక్కులు ఈ రంగంలో గేమ్-ఛేంజర్‌గా మారతాయి. ఈ టిప్పర్ పనితీరు అద్భుతంగా, స‌మ‌ర్థ‌వంతంగా ఉంటుంది. ఒలెక్ట్రా దీన్ని సాధ్యం చేసింది. ఇంతకు ముందు వాగ్దానం చేసినట్లు, మేము కలను సాకారం చేస్తున్నాం” అన్నారు.