thesakshi.com : రాష్ట్ర రైతులకు మేలు జరిగేలా చర్యలు తీసుకోవాలని ముఖ్యమంత్రి వైఎస్‌ జగన్‌మోహన్‌రెడ్డి సంబంధిత అధికారులను ఆదేశించారు. శుక్రవారం తాడేపల్లిలోని సీఎం క్యాంపు కార్యాలయంలో వ్యవసాయంపై ఆయన సమీక్షా సమావేశం నిర్వహించారు. ఈ సందర్భంగా రైతులకు ఎరువులు అందించడంలో ఎలాంటి పొరపాట్లు జరగకుండా చూడాలని సంబంధిత శాఖ, అధికారులను ఆదేశించారు. అంతేకాదు ఎక్కడి నుంచి ఎలాంటి సమాచారం వస్తుందో పరిశీలించి తగిన చర్యలు తీసుకోవాలని సూచించారు.
క్యాంపు కార్యాలయంలో వ్యవసాయంపై సీఎం సమీక్ష. విత్తనాల సరఫరా, ఎరువుల పంపిణీ, వ్యవసాయ ఉత్పత్తులకు అందుతున్న ధరలు తదితర అంశాలపై నిరంతరం ప్రతి ఆర్బీకే నుంచి అగ్రికల్చర్‌ అసిస్టెంట్‌ ద్వారా సమాచారం తెప్పించుకోవాలన్న సీఎం. పూర్తిస్థాయిలో ఇ– క్రాపింగ్‌ చేయాలన్న సీఎం. pic.twitter.com/1fMJZ1BxQ1
— CMO Andhra Pradesh (@AndhraPradeshCM) August 5, 2022
ఆర్‌బీకేలలోని అగ్రికల్చర్‌ అసిస్టెంట్‌ నుంచి నిరంతరం సమాచారం ఉండాలని సీఎం జగన్ సూచించారు. విత్తనాల సరఫరా, ఎరువుల పంపిణీ, వ్యవసాయోత్పత్తుల ధరలు తదితర అంశాలపై పర్యవేక్షణ ఉండాలని, ఈ-క్రాప్‌ను 100 శాతం పూర్తి చేయాలని, ప్రధానమంత్రి ఫసల్ బీమా యోజనను వైఎస్‌ఆర్ ఉచిత ఫసల్ బీమా యోజనతో భాగస్వామ్యం చేస్తామన్నారు.
రైతులకు గరిష్ట ప్రయోజనాలు కల్పించేందుకు తగు చర్యలు తీసుకోవాలని, వ్యవసాయ రంగంలో డ్రోన్‌ల వినియోగంపై ముఖ్యమంత్రి జగన్ ప్రధానంగా చర్చించారు. డ్రోన్‌ల వినియోగంపై మాస్టర్‌ ట్రైనర్‌లను సిద్ధం చేయాలని, డ్రోన్‌ల నిర్వహణ, మరమ్మతులపై శిక్షణ ఇచ్చేందుకు చర్యలు తీసుకోవాలని అధికారులకు సూచించారు. అంతేకాకుండా నియోజకవర్గంలోని ఐటీఐ లేదా పాలిటెక్నిక్ కళాశాల విద్యార్థులకు డ్రోన్‌ల వినియోగం, నిర్వహణ, మరమ్మతులపై పూర్తి శిక్షణ ఇవ్వాలని సూచించారు.