thesakshi.com : రాష్ట్ర ప్రభుత్వ శాఖల్లో ఖాళీగా ఉన్న ఉద్యోగాలను భర్తీ చేయాలని డిమాండ్ చేస్తూ ప్రధాన ప్రతిపక్ష పార్టీ టీడీపీ గురువారం అసెంబ్లీ దగ్గర నిరసనకు దిగింది. టీడీపీ జాతీయ ప్రధాన కార్యదర్శి నారా లోకేశ్‌ ఆధ్వర్యంలో ఆ పార్టీ ఎమ్మెల్యేలు తమ డిమాండ్‌కు మద్దతుగా నినాదాలు చేస్తూ అసెంబ్లీకి చేరుకున్నారు.
2.30 లక్షల ప్రభుత్వ ఉద్యోగాలు కల్పిస్తామని ఎన్నికల్లో ఇచ్చిన హామీని ముఖ్యమంత్రి వైఎస్‌ జగన్‌మోహన్‌రెడ్డి నెరవేర్చాలని ప్రధాన ప్రతిపక్షం డిమాండ్ చేసింది. ఇచ్చిన హామీని నెరవేర్చకుండా నిరుద్యోగ యువతకు ద్రోహం చేశారని ఆరోపించారు. కాంట్రాక్టు ఉద్యోగులందరినీ రెగ్యులరైజ్ చేయాలని వైఎస్సార్‌సీపీ ప్రభుత్వాన్ని టీడీపీ డిమాండ్ చేసింది.
టీడీపీ రాష్ట్ర అధ్యక్షుడు కె. అచ్చెన్నాయుడు సహా శాసనసభ్యులు ‘జగన్ రెడ్డికి ఉద్యోగాలు ఎక్కడ?’ అనే బ్యానర్‌ను పట్టుకున్నారు. జగన్ మోహన్ రెడ్డి హయాంలో నిరుద్యోగ యువత ఉపాధి అవకాశాలు లేక ఆత్మహత్యలు చేసుకుంటున్నారని లోకేష్ అన్నారు.
పొరుగున ఉన్న తెలంగాణ ప్రభుత్వం ప్రభుత్వ శాఖల్లోని ఖాళీల భర్తీకి భారీ రిక్రూట్‌మెంట్‌లను ప్రకటించిన ఒక రోజు తర్వాత నిరసన కార్యక్రమం నిర్వహించారు. తెలంగాణ ముఖ్యమంత్రి కే చంద్రశేఖర్ రావు బుధవారం నాడు 91,142 ఖాళీలను భర్తీ చేస్తున్నట్లు ప్రకటించారు. మొత్తం 11,103 మంది కాంట్రాక్టు ఉద్యోగులను రెగ్యులరైజ్ చేస్తామని, 80,039 ఖాళీల భర్తీకి తక్షణమే నోటిఫికేషన్‌లు జారీ చేస్తామని ఆయన ప్రకటించారు. ఉద్యోగాలు కల్పించడంలో వైఎస్సార్‌సీపీ ప్రభుత్వం తెలంగాణ ప్రభుత్వాన్ని చూసి నేర్చుకోవాలని ఆంధ్రప్రదేశ్‌ అసెంబ్లీలో టీడీపీ ఉపనేత బుచ్చయ్య చౌదరి అన్నారు. రాష్ట్రంలో నిరుద్యోగమే ప్రధాన సమస్యగా పేర్కొంటూ, దాన్ని పరిష్కరించడంలో ప్రభుత్వం విఫలమైందని ఆరోపించారు.
‘‘తెలంగాణ ప్రభుత్వం 90 వేలకు పైగా ఖాళీలను భర్తీ చేయగలిగితే, ఇక్కడి ప్రభుత్వం ఎందుకు అలా చేయలేకపోతున్నది’’ అని టీడీపీ నేత ప్రశ్నించారు. సూప‌ర్‌యాన్యుయేష‌న్‌పై ఉద్యోగుల రిటైర్మెంట్‌తో ఖాళీగా ఉన్న ఉద్యోగాల భర్తీకి కూడా ప్రభుత్వం నియామకాలు చేపట్టడం లేదని ఆరోపించారు.